Radio Amargadhi

डडेल्धुराको अजयमेरुमा भलिबल र कराते प्रतियोगिता हुँने

डडेल्धुरा, भदौ ३१ । डडेल्धुराको अजयमेरु गाउँपालिका –२ चमडामा रहेको विरवेताल देवताको जाँतको अवसरमा दोस्रो अजयमेरु महोत्सव आयोजना हुने भएको छ। यही असोज ७ गतेदेखि ९ गतेसम्म सञ्चालन हुने महोत्सवअन्तर्गत विभिन्न खेलकुद प्रतियोगिता आयोजना गरिने भएको हो।

महोत्सवमा ३५ वर्षमाथिका भेटेरान (दिग्गज) कप भलिबल प्रतियोगिता, खुल्ला पुरुष भलिबल प्रतियोगिता तथा प्रथम अजयमेरु विद्यालयस्तरीय यू–१८ कराते प्रतियोगिता सञ्चालन हुने आयोजकले जनाएको छ।

भेटेरान कप भलिबल प्रतियोगितामा प्रथम, द्वितीय र तृतीय हुने टिमले क्रमशः २५ हजार, १२ हजार र ८ हजार रुपैयाँ पुरस्कार पाउनेछन्। खुल्ला पुरुष भलिबल प्रतियोगितामा प्रथमलाई ७० हजार, द्वितीयलाई ३५ हजार र तृतीयलाई २० हजार रुपैयाँ पुरस्कार प्रदान गरिनेछ। त्यस्तै, विद्यालयस्तरीय यू–१८ कराते प्रतियोगितामा प्रथम, द्वितीय र तृतीय हुनेलाई क्रमशः २० हजार, १२ हजार र ८ हजार रुपैयाँ पुरस्कारको व्यवस्था गरिएको छ।

भेटेरान र खुल्ला पुरुष भलिबल प्रतियोगिताका लागि टिम दर्ता असोज ६ गतेसम्म गर्न सकिने आयोजकले जनाएको छ। महोत्सवमा सहभागी हुन इच्छुक खेलाडी तथा टिमलाई समयमै दर्ता गराउन आग्रह गरिएको छ।